Sorry, this entry is only available in Azərbaycanca and Русский. For the sake of viewer convenience, the content is shown below in this site default language. You may click one of the links to switch the site language to another available language.

2023-cü ildə qlobal iqtisadiyyat Çin istehlakının yaxşılaşdırılması və analitiklərin keçən il qısamüddətli tənəzzülü proqnozlaşdırdığı ABŞ-da nisbətən yüksək iqtisadi aktivlik sayəsində pozitiv böyümə sürəti göstərdi.

Buna baxmayaraq, dünya iqtisadiyyatını geosiyasi münaqişələr, pul siyasətinin sərtləşdirilməsi (uçot dərəcələrinin artırılması, bahalı kreditlər) və qlobal tələbin zəifləməsi məhdudlaşdırdı.

2023-cü ildə qlobal iqtisadiyyata təsir edən risklər 2024–cü ildə də geosiyasi qeyri-sabitlik, yüksək faiz dərəcələri və ümumilikdə əhəmiyyətli dərəcədə qeyri-müəyyənlik aktual olaraq qalır. Bundan başqa, 2024-cü il ərzində özünü göstərə biləcək və qlobal nəticələrə səbəb ola biləcək digər, hələ bilinməyən amillər “ehtiyatda” qalır. Hazırda mövcud olan faktlara və ilkin şərtlərə əsasən analitiklər 2024-cü ildə dünya iqtisadiyyatının 2,1-2,9% aralığında artacağını gözləyirlər.

Goldman Sachs analitikləri 2023-cü ildə olduğu kimi, 2024–cü ildə də qlobal iqtisadiyyatın gözləntiləri aşacağını proqnozlaşdırırlar. 2023-cü ilin əvvəlində analitiklər 2023-cü ildə qlobal iqtisadiyyatın 1,4-2,7% aralığında artacağını gözləyirdilər. İlin sonunda dəqiqləşdirilmiş proqnozlar qlobal ÜDM-in (Ümumi Daxili Məhsul) orta hesabla 2,9-3,% artım gözləntilərini göstərdi.

Fitch Agentliyi 2024-cü ildə qlobal ÜDM–in 1,9%-dən 2,1%-ə qədər artacağı proqnozunu yaxşılaşdırıb, Avropa Komissiyası isə 3,2%-dən 2,9%-ə qədər pisləşdirib. İnvestisiya banklarının analitikləri 2024-cü ildə dünya iqtisadiyyatının perspektivlərini orta hesabla 2,4-2,8% aralığında qiymətləndirirlər. Citigroup–un ən pessimist qiymətləndirməsi 1,9% artımdır.

Asiya ölkələri ilə yanaşı, ABŞ da dünya iqtisadiyyatının böyüməsini dəstəkləyəcək. Fitch agentliyi ABŞ-in ÜDM artım proqnozunu 0,3%-dən 1,2%-ə qədər yaxşılaşdırdı. 2023-cü ilin sonunda ABŞ-da inflyasiya hələ də yüksək olsa da, yüksək dərəcələrə baxmayaraq əmək və mənzil bazarlarında yaxşılaşma görünür.